PDF Version
በብሪታንያ፡ የቅንጅት: ድጋፍ፡ "አስተባባሪ፡ ኮሚቴ"፡ ነኝ፡ በሚለው፡ ቡድን፡ ላይ፡ የተሰጠ፡ መግለጫ።

ለንደን፡ ሚያዝያ፡ 27/ 2000 ዓመተ፡ ምህረት። (May5th 2008)

እኛ፡ በብሪታንያ፡ የምንገኝ፡ የቅንጅት፡ ደጋፊዎች፡የድጋፍ:ድርጅቱ፡ ከልክ፡ ባለፈ፡ መዳከሙ፡ አሳስቦን፡ በጉዳዩ፡ ላይ፡ ቅንጅትን:የደገፉ:ሁሉን:ለማወያየት፡ በድረ-ገጾችና፡ በዘመናዊው፡መልእክት፡ ማሰራጫ፡ (e-mail) በቅርቡ፡ ጥሪ፡

ማስተላለፋችን፡ይታወቃል።ይህ፡ጥሪያችን፡በይፋ፡ከተላለፈ፡ሦስት፡ቀን፡በህዋላ፡እራሱን፡"አስተባባሪ፡ኮሚቴ"፡እያለ፡የሚጠራው፡ቡድን፡ደጋፊዉን፡ለመከፋፈል፡በማቀድ፡በዚያው፡ቀን፡ሌላ፡ስብሰባ፡በመጥራት፡የማፍረስና፡የማደናቀፍ፡እርምጃ፡መውሰዱን፡ደርሰንበታል።

"አስተባባሪ፡ኮሚቴው"፡እስከ፡ዛሬ፡ድረስ፡በአገራችን፡ወቅታዊ፡ሁኔታ፤በተለይም፡በቅንጅት፡ሥራ፡አስፈጻሚ፡አካልና፡በላእላይ፡ምክር፡ቤቱ፡የተከሰቱትን፡ችግሮች፡በሚመለከት፡ደጋፊዎችን፡ሰብስቦ፡አንድም፡ውይይት፡አለማካሄዱ፡ድክመት፡ብቻ፡ሳይሆን፡ሆን፡ተብሎ፡የተሠራ፣የአባላቱን፡የመወያየትና፡ችግሩን፡የመፍታት፡ፍላጎቱን፡አስሮ፡የያዘ፡ደባ፡ነው።አሁን፡ከሁለት፡አመት፡በኋላ፡የቅንጅትን፡ችግርና፡"የአስተባባሪ፡ኮሚቴውን"፡አሠራር፡በሚመለከት፡የደጋፊዎች፡ውይይት፡ለማካሄድ፡ችግሩ፡ጉዳያችን፡ነው፡የሚሉ፡ደጋፊዎችን፡ለማሰባሰብ: ግንቦት፡3ቀን፡ 2000ዓመተ፡ ምህረት፡(May11) ከቀኑ፡ስምንት፡ተኩል፡(2:30pm) ፊንችሊ፡በሚገኘው፡የኢትዮጵያውያን፡ማህበረስብ፡ማህበር፡አዳራሽ፡የተጠራዉ:ስብሰባ፡የሚካሄድ:መሆኑን:በድጋሜ:እናስታዉቃለን።የዚህ፡ስብሰባ፡መጠራት፡ያስደነገጠው፡ደበኛ፡"አስተባባሪ፡ኮሚቴ"፡ደጋፊዉን፡ለመከፋፈልና፡ውይይቱ፡የሚያመጣበትን፡መዘዝና፡የሚያወጣውን፡እውነታ፡ለመሸፋፈን፡በዚያው፡ቀንና፡ሰአት፡ስብሰባ፡ጠራ።ይህ፡አካሄድ፡ደጋፊዉን፡በመናቅ፡የተደረገና፡የድጋፍ፡ድርጅቱን፡ለመከፋፈል፡ታስቦና፡ደጋፊዎቹ፡ቀደም፡ብሎ፡ወደተጠራው፡ስብሰባ፡ሲሄዱ፡ከጥቂት:የመከፋፈል፡ተንኮል፡ወጣኞችና፡አስፈጻሚዎች፡ጋር፡ተስባስበው፡የተለመደ፡ተግባራቸውን፡ለመፈፀም፡እንዲያመቻቸው፡የተወሰደ፡እርምጃ፡እንደሆነ፡ሰዉ:እንዲረዳዉ:ያስፈሊጋል።ይህ፡አይነቱን፡ደባ፡በማውጠንጠን፡በተባበሩ፡አዛውንት፡ግለሰቦች፡ላይም፡በጣም፡አዝነናል።ኢትዮጵያና፡ኢትዮጵያዊነትን፡የሚከፋፍልና፡የሚያዳክም፡እንጅ፡የሚያስተባብርና፡የሚያጠናክር፡መጥፋቱ፡በጣም፡ያሳስባል፤ያስቆጫልም።

በአመራሩ፡አካባቢ፡የተሰበሰበው፡አድመኛ፡ቡድን፡ቀደም፡ሲል፡በደጋፊዎች፡የተመረጠውን፡አመራር፡በየሰበቡ፡እየገፉ፡ድርጅቱን፡ለመቆጣጠር፡ጥረት፡ማድረጉ፡የሚታወስና፡የማይታበል፡ሀቅ፡ነው።በደጋፊዎች፡ከተመረጠው፡ስብስብ፡የተወሰኑት፡ክፍል፡ከስብሰባ፡ውጭ፡እየተስማሙና፡እየተፈራረሙ፡የማይፈልጉትን፡ተመራጭ፡የማስወጣት፡የአድማ፡ሥራ፡አሁንም፡እንደቀጠሉበት፡ነው።በቅርቡ፡ሊቀንበሩንና፡ፀሐፊውን፡ጊዜአችሁ፡አልቋል፡ብለው፡ሃላፊነታቸውን፡በአድማ፡መንጠቅ፡አሁንም፡በመታየት፡ያለ፡ጉዳይ፡ነው:መግለጫም፡ወጥቶበታል፡፡"የአስተባባሪ፡ኮሚቴው"አድመኛ፡አካል፡ይህንን፡የጊዜአችሁ፡አልቋል፡ደባ፡ሲፈጽም፡የራሱስ፡ጊዜ:ማለቁን፡ዘንግቶት፡ሳይሆን፡እያወቀ፡ደጋፊዎችን፡በመናቅ፣ማን፡ይጠይቀኛል፡ከሚል፡ "የልብ፡እብጠት"፡በመነሳት፡መሆኑ፡ግልፅ፡ነው።

"የአስተባባሪ፡ኮሚቴዉ"፡የፋይናንስ፡አያያዝ፡ብዙ፡ጥያቄ፡ያለበት፡መሆኑን፡ደጋፊዎች፡እንዲያውቁ፡ያስፈልጋል።የቅንጅት፡አመራር፡እሥር፡ቤት፡በነበረበት፡ጊዜ፡ወደ፡አገር፡የሚላከው፡ገንዘብ:በሚስጥር፡መሆን፡አለበት፡በሚል:ከለላ፡ከአሜሪካኑ፡"አለም፡አቀፍ፡አመራር":በመጣ፡መመሪያ፡ከ15ሺህ፡ፓውንድ፡በላይ፡ወጪ:ሆኖአል።በጊዜው፡የነበሩት፡ሰዎች፡ጉዳዩን፡ለማጣራት፡ሞክረው፡ምንም፡የሚያስተማምን፡ነገር፡አልተገኘም።አሁን፡ግን፡አመራሩ፡ከእሥር፡ቤት፡ወጥቶ፡በነፃ፡መንቀሳቀስ፡ላይ፡ያለ፡ስለሆነ፡የሚያስፈራ፡ነገር፡የለምና፡ለግለሰቦች፡መርጃ፡በድብቅ፡ተሰጠ፡የተባለው፡ገንዘብ፡ሁሉ፡ በሂሳብ፡ሙያተኛ፡ተጣርቶ፡ለደጋፊዎች፡ሪፖርት፡መቅረብ፡አለበት። 

የሂሳብ፡ማጣራት፡ዓይነቱ፡ቅድመ፡አመታዊ፡ስብሰባ፡ዝግጅት፡ሳይሟላ፣እንዲያውም፡የአመታዊው፡ስብሰባ፡በማህበሩ፡ደንብ፡ከተደነገገው፡ጊዜ፡በላይ፡ብዙ፡ከተላለፈ፡በኋላ፣ሳይቀድሙኝ፡ልቅደም፤ካልሆነም፡ላደናቅፍ፤ከሚል፡እኩይ፡አስተሳሰብ፡በመነሳት፡"ከአስተባባሪ፡ኮሚቴው"፡አንዱ፡ቡድን፡ያልተሟላና፡ደንብ፡የጣሰ፡አመታዊ፡ስብሰባ፡ጠርቷል።አመታዊ፡ስብሰባ፡ ለመጥራት፡በማህበሩ፡ደንብ፡የሚሰጥ፡የጊዜ፡ገደብ፡እንዳለ፡እየታወቀ፣ይህ፡ሥርአት፡አልባ፡"አስተባባሪ፡ኮሚቴ"፡ግን፡የጠራው፡ስብሰባ፡የሕገ፡ደንቡን፡የጥሪ፡የጊዜ፡ገደብ፡ይጥሳል።

ቀደም፡ሲል፡ለግንቦት፡3ቀን፡2000፡ዓመተ፡ምህረት፡(may11)ስብሰባ፡የጠራነው፡ደጋፊዎች፡ግን፡አሁንም፡በድጋሚ፡አደራ፡የምንለው፡በፊንችሊ፡ኮሚኒቲ፡አዳራሽ፡በተጠራው፡ስብሰባ፡ቅንጅትን:የደገፈ:ሁሉ:ተገኝቶ፡በተከሰተው፡ችግርና፡"የአስተባባሪ፡ቡድኑ"፡በሚያውጠነጥነው፡ደባ፡ላይ፡በጥሞና፡ለመወያየትና፡እንዴት፡ወደፊት፡መሄድ፡እንደሚቻል፡ስምምነት፡ላይ፡እንዲደረስ:በድጋሜ:እናሳስባለን።ስለሆነም፡በቅርቡ፡በተበተነው፡"የአስተባባሪ፡ኮሚቴው"ተገንጣይ፡ክፍል፡በጠራው፡ጥሪ፡ሳትወናበዱ፡ደጋፊዎቹ፡በጠሩት:ስብሰባ፡እንድትገኙና፡ችግሩን፡በውይይት፡እንድንፈታ፡ይህን፡መግለጫ፡አውጥተናል።                        

በደባና፡ግልፅነት፡በጎደለው፡ሥራ፡ኢትዮጵያ፡አትድንም።        

በጠባብ፡የቡድን፡አሠራር፡ወያኔ፡አይሸነፍም።

ለአንድ፡አገር፣ለአንድ፡ሕዝብ፣በቁርጠኝነትና፡በህብረት፡እንቁም።  

ኢትዮጵያ፡ለዘላለም፡ትኑር!!!!!

More Info

 CALL FOR A MEETING OF KINIJIT SUPPORTERS IN THE UK

---

Comments (0)

Subscribe to this comment's feed

Name

Email

Comment

Write the displayed characters

Add Comment